Zu Ve Thung

Summer laiin ka chhuak vaka, kawng kan turin kawngsirah ka ding a, motor tlemlai ka chang a, chutia ka din lai chuan Chinese pa valai, rui zet mai hian min rawn pan a, hei ka rui em a, kawngkan ka huphurh deuhva, i rualin ka lo kal ang e, motor a tlan chak si a ti a, ka kai a, kawng ka kanpui a, ka bulah tluk hlau deuh hian a kal pai tuang tuang a, a mood lah chu a fuh phian a, a khi deuh sung mai a, chhuna zu a in ngai loh thu te, vawiin chu a ruih sual thu te a sawi loh lohva, ka nuih a za rilru khawp mai a, kawng kan kan zawh chuan polite zetin lawmthu min hrilh luam a, ka kalsan ta a.

Kan khua hi a vawt bawk a, zuin an tam hle. Winter ah intihlum nan zu an in a, summer ah an sim leh lawk thei lova, ngawlvei an tam ve khawp mai. Zu a lar a, a man a tlawm bawk si a, khawlaia zuin ho let let hmuhtur an tam khawp mai, kan khua, Harbin beer hi china beer a upa ber a ni a, kum za chuang tawh a ni a, mipuite hian an chhuang hle a, an in nasa hle bawk. Mineral water aiin a man a tlawm zawk a,in nasat pawh a awm ve viau ani.

Heti khawpa zu an in nasat lai hian, zuruih vanga buaina siam, insual bung bung leh chhungte rikrap zawng a che ka la hmu lo, ruihdan an thiam hle.

Kan rama Total Prohibition Act lek kawh a nih a, mi tam takin an phunpui lai hian, chinese ho ang hian zu indan te thiam ve ila chuan zu khapte hi kan ngai biklo tur a nia le....

Kan inhnuai ah hian chaw dawr te reuhte a awm a, chutah chuan chaw ka ei a, tuilum in tur hi an dah thin a, mahniin kan va la mai thin a, tuilum andah thinna ah chuan bottle lian ang reng fe hi an lo dah thar a, a pang ka khawih a, a vot a, ava tha em, tuivawt anlo chhawp ve anih hi ka tia, ka thli chhuak a, ka'n lem pawp mai a, Chinese ho local zu treng chhuai mai alo ni a, ka pum a sa thla rum rum a, toilet ah ka va uak chiam chiam a,a chiloh teh a sin aw!! ka lem hman toh si, ka ruih leh ruih loh ka ngaithla vang vang mai a....ka rui lo anih ka ring, engtinmah ka awm lo tlat, Experience 'kha tak' ani, ka sim hmaks!

Great Wall of China

Hmanni deuh khan Great Wall tlawhna hun remchang kan nei ve hlauh mai a, naupan lai atanga kan lo hriat tawh, mit ngeia hmuhna hun remchang neih chu lawmawm ve tak a ni. A chanchin sawi ka tum lem lova, kan thawh chanchin ho mai mai sep ka tum. Mizo tobul chhuituten ' Chhinlung' an chhuina ah, Great Wall an chhui thleng thuak thuak a, a taka han hmuh ve chu a manhla ka ti ve hrim hrim.

Thlalaka kan lo hmuh thin a a landan aiin,a hmunah a awih phian mai. Kal an phal tawp chin kal thlen loh kan ui ve si, hah zetin a tawp kan thleng ve hram. Great Wall hi a chhuk chho tih a lanna chu Chinese ho hian Great Wall ah ka kal an ti ngai lo, Great Wall ah ka lawn an ti thin. Tlangchhip chhengchhia, hmun awih lai a sak anih avangin a hautak dan turte, thawktu chhawrte retheih leh hah tur zia te a ngaihtuahin rilru in kum 2000 aia tam liamta a an sak hunlai te a ngaihtuah loh theih loh. A chhe lai thawmthat ngaite a awm avangin tunhnu a siamthat lai aawm nual tawh a, mahse a upat tawh zia te, a lung chan that dan turte, tha a ngaih tam zia tur leh a sei zia te ngaihtuah chuan khawvel thilmak te zinga a tel hi a phu reng ani.

A chhip sanglaiah dawr a lo awm nual a, Chinese dress nena thlalakna te, tlawhtute tan souvenir tur, eng eng emaw anlo zuar a, Brass plate mawitak, 'If we fail to reach the Great Wall, we are no heroes' tih English leh Chinese a inziak Great Wall lem mawitak awm bawk chu kan lei ve. Kan kal ni hi a fuh vak lova, khua a duaiin chhum a zing deuhva, duh ang zanin thlalak a fiah tha ta lo, Hmuntinah mihring kan zi luih luih vek mai a, thlalakna hmun fianrial pawh a vang hle, hmana fiamthua China chu mi an tam lutuk a, single photo ah pawh mi 10 te an lang thin tih ang vel kha ania, mahni reng rengin thla a lak theih loh. Mi rehna lai deuhva nail cutter kan phawrh vat a, a bang lung ah chuan hmanhmawh takin kan hming kan ker chawt chawt mai a, hming ain ker khat chiai chuai mai a ni, hlim takin hei, Great Wall ah ka hming a awm ve ta vah mai kan ti a,kan nui bawk bawk a, chutih rual chuan rilru ah Van Nunna Bu a hming chuang hlut zia leh lawmawm zia te ka ngaihtuah thleng a.

China rama ka hmuh chak ber te zinga mi, ka hmu ve ta ka lawm hle a, ka in fit lemlo bawknen, a hnu ni 2/3 chu chet harsa khawpin ka rawl a ni, thian tu emaw hian min rawn tlawh ang a, Great Wall ena kalpuiah min sawm ang tih ka hlau rum rum tawh zawk mai!!

When I fall, He lifts me up!
When I fail, He forgives!
When Im week, He is strong!
When Im lost, He is the Way!
When Im afraid, He is my courage!
When I stumble, He steadies me!
When I am hurts, He heals me!
When I am broken, He mends me!
When I am blind, He leads me!
When I am hungry, He feeds me!
When I face trials, He is with me!
When I face persecution, He shields me!
When I face problems, He comforts me!
When I face loss, He provides me!
When I face death, He carries me home!

Kei leh U Dengziki

U Dengzik, Mangtha Le

21st July, thimhlimah, beisei phakloh chanchin lawmawm lo lutukin min deng a, "U Dengziki Siliguri ah motor accident in a boral...!!" Amak lutuk a,ka awih thei lo,ka ring phal hek lo, chanchin kan hre zel a, a dik ngei bawk si, mumang nise ka ti ngawih ngawih a,a tak a ni bawk si!!! Lalpa hian engatinge hetiang thilte a lo thlen tir tak mai le ...??

Kan leader, kan thian, kan u hi keini China a Y thawktu,Indian awmte tan hian a hlu thlawt a, kan vaiin "Kei hi chu U Dzi puihna leh fuihna avang liau liauva tun hi thleng thei ka nia,ka tan a hlu bik em a ni," kan ti theuh mai! Indian thalaite China rama rawngbawl tura chhertu, a kal apiangte kawng sut kuak sak a, engkima puitu ani a, thawkmekte tan pawh nu nih a tling takzet a, tawngtaipui kan ngaiha min tawngtaisaktu, fuih kan ngaiha min fuihtu, hnem kan ngaiha min hnemtu,kan duh leh harsatna kan thlen ngamna, fiamthu nena hlimtaka kan kawm thin, kan leader, kan thian, kan u a ni.

A vanglainite Lalpa tan a hmangral a, a thih thlengin rinawm takin kohna a dawn angin rawng a bawl ani. Ama experience atangin thil tam tak min hrilh thin a, a mi fuihnate kha rilruah a cham reng tawh dawn a ni. Lalpa hian engvanga kan mamawh em em laia hruai ta mai nge anih ang aw? ka ti a,he thihna hmang hian Lalpan tih duh ropui tak a nei niin ka hria. A nun ka enlet a,a inpekna thukziate, a inngaihtlawmnate, a zaidam ziate ka ngaihtuah a, tlukloh rim a nam a ni, a nunah entawn tur ka ngah hle, nasa takin min cho thar ani. U Dzi thihna hian midangte cho chhuak thar se, a hnachhunzawm tur mitha Lalpan minpe se, a kalsan a nu leh pa, a unaute Lalpan awmpuiin thlamuan se tih hi ka tawngtaina a ni.

9th Feb a Chiangmai bus station a Bangkok a pan tur kan thlah kha he khawvela kan hmuhtawpna tur a lo ni ta reng mai a,thil thatak min lo hawn dawnnia tiin hlim takin min then kha a ni sia, hrilh a hai a ni..

"I thawhrimnate chawlhsanin
Natna awm tawh lohna hmunah
Lalpa hnenah i chawl ta maw?
Kan ngai bang dawn lo che,
I hmangaih Chinese thlaraubote,
Lalpa kebula hruai turin,
Hnehna tumkau an chawi ve nan
I nauten hma kan la zel dawn,
Van atangin minlo thlir ang che aw
U Dz, mangtha le"

Thilpek duhawm

2005 khan Dimapur Base ah DTS lecture phase-a topic thenkhat chhimin thlahnih chhunglek ka awm ve a, ka awmreiloh tehlul nen nuam ka ti hman khop mai a,Pathian nena inhnaih takin hun ka hmang a,hlawk ka ti kher mai. Ka chhuahsan dawn chuan ka thiante hovin ka hriatlohvin thil engemaw an lo plan ru a, ka chhuahhma ni tlaiah farewell dinner min siamsak a. Zanah ka pualin programme hlimawm tak an siam bawk a,hnamdang thianten a hma daiha mizo hla nalh i tih deuh min lo zirtir teh,an tih vanga ka zirtir,"Lal Isua ka neih phawt chuan ka rethei love" tih hla ngeimai chu min thlah nan an sa a,ka beisei phak bak ngaihhruina thilpekte min pe hlawm a,school hmingin "exercise bu kawm sen" hi min pe bawk a, lawmthu sawi tura ka dingchhuak chu ....a zialo ang reng,ka hrawkah tah a awm a,ka tawng hlei thei der lo mai a.

Programme zawh hnu chuan ka thilpek dawnte roomah ka luhpui a, ka'n en vel a, kawrte, cosmetics te, naga hnam hrang hrang puan leh shawl etc te a lo ni a, ka lawm ngei mai. School hminga an lehkhabu min pek chu ka keuva, a phek hmasaberah Josua 1:9 "Chaktak leh huai takin awm rawh, hlau suh la, zam hek suh. Lalpa i Pathian chu i kalna apianga'n i hnenah a awm zel dawn alawm" tih thu hi a inziak a. An vai chuan an thlalak,min thlahna thuchah leh fuihna thu te, Baibul chang min pek te, fiamthu eng engemaw an ziak hlawm a. Ka hlimpui kher mai.

An thilpek tam zawk hi ka kalna apiangah ka keng zui zel thei ta lova, school puala min pek lehkhabu erawh chu a zangkhai bawk a, ka kengzel a, ka ngaihzual chang hian ka keu kual ka keu kual thin a, an mi fuihna leh Baibul chang min pek te tun thlengin min tichak thartu an la ni reng a ni.

Reilote kan awmho chhunga Pathian hnathawh ropui tak kan dawnte,hun harsa leh hlimawm kan paltlang hote,kan nuih ho tlawrh tlawrh laite kha ka ngai thin. An thuziak ka chhiar apiangin min tihlim thin a, min tawngtaisak reng tur thu te an ziak hlawm a, thenkhatin min ngaih turzia te, thingpui ka heh em avanga thingpui an inchang apianga min hriatchhuah tur thute, zaiho leh ngei an chakzia te,an zai apianga min hriatchhuah fo tur thute an ziah laiin a thenin chimawm ru min tihzia te, harh min tih em em zia te, chawei laia fiamthu sawitur ka awm dawn tak loh avanga puar taka chawei ve an inbeisei ve tawh thute a ni nawk mai a, ka keu apiangin ka ngaihtuahna hi Dimapur 5th mile Y Base ah a leng vang vang thin ani.

Tun thlenga min tawngtaisaktu khang thian thate kha Lalpa min pek an ni tih ka hria a, vannei ka inti thin. Vawikhat tal han hmuhleh hlawm te hi ka chak em em thin. He an "lehkhabu sen" min pek pawh hi ka thilpek dawn tawhte zinga hlu ber te zinga mi a ni a, a la hlu telh telh dawn ni pawhin kahria a, ka roh hle.

(Dimapur Wala's puala ka ziah ani e)

A lesson from the Chinese bamboo tree

You take a little seed, plant it, water it, fertilise it for a whole year....and nothing happen!
The second year, you water it and fertilise it, and nothing happen!
The third year, water it, and fertilise it and nothing happen...how discouraging this becomes!!
The fourth year, you water it, fertilise it, and nothing happen....this is very frustrating.....!!
The fifth year, you continue to water and fertilise the seed, and then......sometime during the fifth year, the Chinese bamboo tree sprouts and grows!!!
90 FEET IN SIX WEEK!!!

Life is much akin to the growing process to the Chinese bamboo tree, It is often discouraging we seemingly do things right and nothing happens....
But for those who do things right,and are not discourage and are persistent, things will happen finally we begin to receive the rewards!!

Pine Tree leh Kei

May thla kan kai chhova, kan khua meuh pawhin lumlam a pan ve ta. Kawrlum pakhat bak hak a ngai ta bik lo, Oct thla khan khawvawtin thing tuarfei lo ho chu an hnah a hmet rova, a tlakawlh zo vek a,thla 8 dawnlai thinghring hmu tur awmchhun chu Far kung (Pine tree) chauh hi a ni. Hawina lam apiang a ro em em a, thlalera awm ang mai niin ka inhre fo thin. May thla a lo kai chhova, thingte an lo chawrin an lo hring leh ta a, pangparte an lo vul leh ta chek chuk mai... China ah hian khawpui tin mai hian mahni khawpualin pangpar an nei hrang theuhva,Harbin Pangpar(Dingxiang Hua) leh Chinese National Flower(cherry Par) an parvul nasat lai a ni a, hmuntinah pangpar rimtui tak hriattur a awm reng a, khawhawi a tinuamin nun a tihahdam ngeimai!Mahse thlasik alo thleng leh ang a, an ro leh vek dawn sia, mawi tak maiin han parvul reng mai sela aw...ka ti thin.

Thlasik chhung, green leaves reng reng hmuh tur a van em em chhung khan engkim mai hi a chul rup mai hian ka hre thin a,"Thinghring hmuh ka van chak tak em..." ka ti thin a. Kan campus ah hian Far kung a awm nual a, kalkawnga awm a ni bawk a, nitin ka kalpel thin a. Khua a vawh tlawk tlawk lai pawh khan far kung erawh chu hnah tlakawlh ve lovin an hring reng a, heng far kung ka kalpelh apiang hian "thuchah"min lo hlan thin a,anmahni anga chhel taka awm tur leh,"nun hring reng" nei turin ngawi rengin min lo fuih mawlh mawlh thin.

Thingtlang zin

Chinese Newyear hmangin thingtlang vetak "Fengfu" khua ah kan kala,khaw tereuhte, in 20 emaw lek a ni a,zanah chuan an khuaah ramdang mi kan awm tih an hriatin pitar, putar, nula tlangval, naupang chenin an lo leng luih luih mai a, keini duh ang pawh kan la sawitheih hma, tawng kan la harsat zual lai a ni bawk nen, kan ri nuaih nuaih a ni ber mai, a thenin min bengngawng biak a, a thenin zaizirin, lemziak nen, dictionary nen kan bei nasa mai a, kan nui tlang ham ham reng mai, a va hlimawm dar dar tak em aw!

Mi in-ah kan leng kual nasa hle a, kan kalna apiangah nihawichi leh badam min chhawp a, kan ei reng tur a ni a, ka hne haw hnawk mai..Thlasik laia ni a, leilung lang awm miahlovin vurin a khuh vek a, khaw vawh lam poh degree minus 20-30 vel ani a,mahse chhungtinin min welcome nan ice cream min eitir zel bawk. Nitin darkar 4 dan velah regular takin chaw kan ei a, ril a tam hman miah lo a ni ber mai.

Choka ah thuk lianpui an nei a,belpui laksawn theihloh an chhuang a, chu chuan chaw an chhum a, chawhmeh an siam vek bawk a, an hman zawhah tui an leih a, hmunphiah(bel phiah)in an phiatfai zel thin. An choka thuk zawnah room lehlamah khumpui, hluma siam a hnuai kawrawng an dah a, chu chu chhunah inleng thutna, zanah an mutna a ni nghal a,thuk mei lumin ahnuai atangin englai pawhin a ur lum vung vung reng thin ani. He khum hi chhungkaw member zawng zawng mut lenna tur hisapa siam a ni a, nu leh pa leh an fate an mu ho vek a, an inchhungah khum dang an nei lo.

An inhnunglam chu an lo a ni nghal mai a,kan province hi a vawh avangin thla 7 vurin a khuh chhung hian lo lamhna an thawk thei lova,thlasik atan theihangin an inchhekkhawl thin a,thlairep te,thingtuahtur te an chhek vum hnek hnuk mai ani.Thing hi an ngah ve loh avangin thingfak aiah buhpawl leh vaimin kung rote,thlai kungro dang dang thingtuah atan an hmang a,an ngah em avangin ren ngai miah lova tuah tur intiat tiatin hmun tam tak ah an chhepvum hnek hnuk mai a ni.

In tinin an insak hmain an inhnuaiah tuichhunchhuah an lai hmasa vek a,tui ah harsatna an tawk lo,duhtawka hman tur tui an nei vek a ni. An insakah bathroom an siam tel ngai lova,a khua a vawt bawk a, an inbual ngai meuhlo a ni, nipui laiin vawi 2/1 an inbual ve thin a, an nuna inbual pawimawh lem loh avangin bathroom siam tel kha a tul berlo a ni awm e, bathroom nei an awm lo reng reng. Nipui laia an inbual kha a kum leh nipuia chhunzawm leh turin an nghak vang vang mai thin a ni.

He khua FENGFU khua ah hian kan thiannu leh a nu chiah ringtu an la awm ani.

Trust Me

Sweet child of mine,
There's nothing to fear.
I have said to trust Me at all times
Because I am a refuge,I am a shield
I am help--there is safety and rest
in releasing your many worries to Me.
I have told you to trust me
and nestle,like a young bird
beneath the shadow of its mother's
mighty wings where it is safe
Trust me to be Me
Trust removes the rumbling mist if fear,
Let it be settled in your mind
that your life,your work,your loves
your health,your prayer
your past,your future
are constantly guarded
by My mercy and love
You are soldered into the center of my eyes
Trust me
Trust me--
and you will not be afraid
Trust me--
and you will stop hurting yourself
Trust me--
and you will know
you are safe
even when it appears you are not
Trust me--
and in time
you will grow to love my dicsipline
Trust me

Sap Hming

Mizo pawhin sap hming kan uar ve tho va,fiamthu ah pawh Of Thuama te poh kan neih kha....Chinese ho zingah pawh hian sap hming neih chu a changkang bon tawp a ni ringawt...... Hming phuah tur hre lo ve fe fe pawh an tam, kan mi tawn tawh zingah, Panasonic-a te,Credit Card-a te, Tongue-a te, Milk-i te , Sweet-i te an awm hlawm, i hming engnge? min tihte hian Nunui ka ti thin a, chu chu saphming emaw an la ti talh a, engnge i Indian hming min la ti hram thin!!

English corner ah thiante kan siam a, Sap hming neih ngei an duh vek a,hming la neilo chuan sap hming min lo phuahsak an ti chawt chawt fo mai a, chuvangin hei hi remchanga hmangin Baibula mi te hming kanlo phuahsak thin a, a hming neitu chanchin leh Pathian mi an nih thu te hrilhin, Pathian thu sawipuina hun remchangah a chang fo thin. A chang chuan an saphming kan hriatsa reng te kha kan han hmuh leh meuh chuan saphming dang an lo nei leh daih tawh thin a, a chhan chu an hming aia nalh an tih zawk sap hming dang an hriat chuan an thlak thuai mai thin a ni,Sap hming an nei nghet lem lo.

Kan thawhpui, John-a of Kunming chuan English corner ah tlangval pakhat a hmuh chu, a saphming chu 'Satan'-a a ni teh tlat a, a ni lo ngaihdanah chuan saphming pangngai tak niin a lo hria a, an inhmu a,Pathian thu te, sual thu te, setana nihna te an inhrilhfiah hnuah a hming thlak a duh mai nilovin,Isua zuitu nih a duh thu te a sawi ta hial zawk a ni.

Kan thenawmah hian hmeichhe naupang kum 6 mi, duhawm deuh mai Yang Yu Die a awm a, kan in hrik ve a ni a, a lo leng zing khawp mai a, a saphmingah Mary kan phuah sak a, saptawng kan zirtir thin a, a hre ve nual tawh a, mahse a chang chuan a lo ngaih pawlh thin a, what is your name? ti phut ila, good night ti ten min chhang sual hah hah thin.

Nuihna a tam a, a nuam ve reng
...........................................................................................................................................................................

Kalvari Kawng

Chumi nia ram lam atanga Jerusalem lo thleng hlim hlawt, Simona chuan chanchin engmah a hre lova, engemawtak a thleng a ni tih chu a hre ve a, engnge lo thleng en tumin mipui a tawn phei tawlh tawlh a, a tawpah chuan mipuite thil thlir chu a hmu ve ta.

Mi pakhat, hlinglukhum khum, misual ni ngei tur, Kros-a khenbeh tura an rawn hruai chuan ama kros tur a rawn pu a, a chauh hmel em em lehnghal a, sipai ten an vaw zawt zawt a, mite chuan an nuihzat a, an lo nam sawk sawk bawk nen. Simona lo dinna bul a lo thlen chuan a chau lutuk chu a tlu ta thlawrh mai a,a tho ta mai si lo, a chau lutuk aniang....vengtu sipai chu a hawikual a, chu mitang kros put pui tur mi, chak hmel deuh chu an melh kual a, Simona chu a a rawn ko ta nalh mai.

Kros hi anchhedawng a an ngaih misual, nun pawh nung ve tlak toh lova an ruatte an hremna, an tihhlumna a ni a, an khenbeh thin te pawh misual tawrawt pui pui hlir an ni. Misual thi tlaka ruat, mi zawng zawng huat hlawh chu kros put puitu nih poh a chakawm hran lohva, mahse chu mi tang chau hmel chu an en a, puih duhna a nei a, misual hmuhin a hmu silo...an en thup lai chuan hmalamah a lo pen chhuak a, kros chu a put pui ta a ni. Kalvari tlang thlengin kros chu an pu dun ta a ni.

Chu mitang,Isua chuan an mantirh atang tawh khan tumah puitu leh tantu reng a nei lova, a zirtirte pawhin an tlanbosan zo vek a, a huaisen deuh pawl pawhin hla tak atangin an zui ngam chauh a ni a, he Simona hi hun harsa a paltlang chhunga huaisen leh zam lova puitu a hmuh chhun a ni.

Hetihlai hian vanmite pawhin kalvari kawng chu an lo thlir ve thup bawk a, chau lutuka Isua a tluk lai te khan puiduhtu awm sela aw... an lo ti a, a pa Pathian tan phei chuan thlir a har ngei mai. Hmangaihna avangin Engkimtitheia khan engmah a ti thei rihlo tlat si! Simona lo pen chhuak a,kros a ron put pui ta chu van mipui te kha an lo lawm teh asin..

Simona anga Lal Isua kros putpuitu nih ve theih a va han duhawm em! Isu, kros putpui ve tur chein ka inpe a, i tan huaisen tak leh rinawm turin ka inpe e, kan ti ve thei angem le? Kan inpek phal phawt chuan Kalvari tlang thlenga a kros lo pu tawh Lal Isua hian kawng a hria a, kaldan pawh a thiam a, a rual zelin aman kaldan min zirtir zel dawn a ni.

Lalpa minpui rawh nitinin,
Ka kros chu pu turin.
I lungngaih no pawh in turin,
Ka tan i phur vek si
...................................................................................................................................................................

China Rama Chanchin Tha Meichher

(A hmasain word thenkhat sawi pum hlauhawm deuh ho a tawi zawng leh saptawnga sawi hrehawm deuhte mizo tawnga hriatthiam theih turin ka ziak a, in lo hrethiam dawn nia)

China ramah hian Lal Isua thih hnu kum 600 velah, Nestorian hovin Chanchin Tha meichher an lo pu lut tan a,hna chhunzawm turin raawngbawltu M an luh belh zel a, zawimuangin ringtu an pung chho ve zel a, kum 1919-ah chuan Chinese tawngin Pathian lehkhabu (Union version) an publish thei ta a, a hnu lawk kum 1921-ah chuan tuna rorellai pawl, kawmiunis pawl a lo ding tan a, ramdangmi, a bikin M te hnawhbo chu an thiltumte zinga mi a ni a, 1921 ah M do pawl te lo piang zelin, ringtute pawh nekchep an lo ni tan ta a, 1946-49 velah kawmiunis thlipuiin ram a nuai ta tak tak a,"China tundinna" thupuia hmangin mite rilru an hneh ta hle mai a,a tawpah phei chuan sorkarna an lo chelh chho ta nge nge a,chuvang chuan M awmte chuan a ram an chhuahsan ta hum hum mai a,a tam ber chuan 1950 chho vel (early 50's) ah an chhuahsan a ni.Ram chu Kawmiunis sawrkar hnuaiah a awm ta a,pawnlam atanga Chanchin Tha hrilh theihna awmchhun chu short wave hmang chauhvin a ni ta rih a, tichuan khawvel ramdang hnuchhawnin, anmahni in kum rei fe chhung an intihrang ta a,Mao Tze Dong (Mizovin Mau seh Tung-a kan tih kha) hruaina in chutih laia khawvel sawrkar ropui, British sawrkar kum 15 chhunga leh pelh tumin an tang nasa mai a,a tir lamah hlawhtling dawn awmin a lang na a, a ziktluak ta lo hlauh a ni.Kum 23 zet hnua America President Nixon a zin khan khawvel nen inzawmna a siam leh tan ta a ni. Hetih chhung hian ringtuten an tuar nasa em em a,nekchep leh tihduhdahna kara tihduhdah leh thih pawh huama Lalpa tana rinawm tlat mite avangin Chanchin Tha meichher chu a mit lova,Kohhran a thang chho ve zel a,'78 kuma Deng Xiao Ping-a "kawngkhar hawn"pawlisi a vangin ramchhungah M te a rukin an lut leh thei tan ta a, mahse a hma angin M hming puin an lut thei tawh lova, platform engemaw an neih a lo tul ta a,hna te thawkin, chumi phenah chuan Chanchin Tha an puangdarh leh thei ta ani.

Sawrkar a register Kohhran an awm a, mahse ringthar siam leh midang inleh te khap anih avangin register loh Kohhran lo ding zui ve ta zel a,tun dinhmunah chuan register aiin register loh Kohhran hi a lian tawh zawk ani.Register loh Kohhran hruaitute hian an zalen ve deuh hnu, 1998 Aug khan sawrkar ah ngenna an siam a,tunah chuan heng register Kohhran te nen hian sakhaw zalenna hmunkhat an lo enjoy thei ta ani. Zalen taka inkhawmte phalsak an ni ve ta.

2002 kum khan China ramchhunga kum tam tak an khap, Pathian Lehkhabu chu a ramchhung press ngeiah 30 million lai an chhu leh thei ta a,khawvel ramdang atanga harsa fe a lakluh thin kha,an ramchhung ngeia chhut phal an lo ni leh ta chu,khawvel leh china rama ringtute tan lawmna nasa tak a ni. Kawng inhawn sawtzia tilangtu ani bawk.

Nikum kumtawp lam khan CCTV 9,China a English channel awmchhunah,news ka en a, China rama ringtu inzawmkhawm pawl,Kohhran hrang hrang ten Beijing-a inkhawmpui an hman thu an rawn puang a,sakhaw lam news reng reng puan a awm khat a, beng a verh zak mai a,he khawmpuia Chinese ringtute chibai buk nan America rama naupangten an chibai bukna thu mawi tak tak an thawn te pawh an tilang a,Pathianin China a hmangaih, Isuan a hmangaih che, Isua i tan a thi a ni,tih leh thudang tam tak an rawn tilang a, phur em em in ka thlir dauh dauh mai. Nikum vek khan China Muslim hote pawh Haj (khaw thianghlim tlawh) turin mi tam tawk sawrkarin a tir liam ve ta nghe nghe a ni. Sakhaw zalenna a inhawng ve zel a, engtikah emaw chuan zalen takin he ramah hian Pathian kan la bia ang a,mitin ta tur Chanchin Tha hi an la dawng kim ngei ang.

Tunah hian China ram chu Olympic thleng turin a inbuatsaih nasa hle a,he Olympic hmang hian Lalpan hna thawk se tih hi kan duhthusam leh tawngtaina a ni a,Hmangaihtu Pathian an lo hriatna hun alo nih theih nan leh sawrkar hruaitute rilru pawh a lo inhawn chhoh zel theih nan tawngtaina-in i tang tlang ang u aw...
...................................................................................................................................................

Kan Awmna Harbin Chanchin Tlangpui

Kan awmna Harbin khua hi China ram hmarchhak kiltawp a awm, Heilongjiang Province khawpui a ni ve a. Russia, Japan, Korea te kan hnaih a, China ram khawpui Beijing pawh relin darkar 12 kal chauh a ni.China ram khawpuiah chuan a vawt ber a ni a, Oct-Apr chhung hian degree below zero degree ah kan awm thin a,a vawh tak taka lai chuan minus 40 degree te kan thleng thin a ni.Winter hian thing hring hmuh tur kan nei ve ngai lova, below minus degree-a kan awm chhung hian kan khawro ngawih ngawih mai thin a ni.

China ram hmun dang angin chhuan tur hmun hmingthang leh historical site te kan nei ve lem lova, Winter apianga International Snow and Ice Festival an siam thin hi kan chhuang ve em em a, vur (snow & ice) hmangin thil hrang hrang - milemte an siam a, in lianpui puite an sa a, helai hmun hi zautham zet mai a ni a, duhtawka thlir tur vur ennawm chi hrang hrang an siam a ni ber mai. Khawvel hmun tam tak atangin he festival chhim tur hian mite an lokal nasa ve hle thin a ni. Kumin chu kan va kal ve a, a kal a manhla hle mai a,vawh erawh chu vawt teu teu tak a ni.

Harbin hi a awmna hmunin a zir bawk, thenawm ram te kutah a awm zing hle a, Kum 1917 atang khan Russia in a awp a, hei vang hian aniang Chinese style inchung zum er deuh ang chi te hi a awm ve lo reng reng a, Russian Architecture in a influence nasa hle a ni.Building hi Russian style a sak vek a ni. Russia kut atangin 1932-ah Japan in an la a, indopui-in a nang zui a, Japan sawrkar hian Harbin khuaah hian Germ Warfare Base Research Center an siam a, rawva takin an che a, Chinese mipuite inzir nan an hmang a, mihring taksa in engtia rei nge khawvawt a tuar theih? tih en nan mai mai te mi tam fe khawvawtah saruakin an dah hlum a, an bacteria hmuhchhuah thar mihring taksa a hna a thawhdan en nan te mi tam tak tihluihna-in an chiu hlum a, mihring taksa bung hrang hrang zir nan mi damtha laite an zai hlum a, khatihlaia an base siamna hmunah ngei khan tunah hian chumi hriatreng nan chuan Museum an siam a, chutihlaia nunna chantate hming leh an chanchin te, an thihdan te, an thlalakte an theih chin chin an la khawm a, he thil vang hian mi tam takin nunna an chan a, he museum-a an ziahdan phei chuan mi 30,000 chuangin nunna an chan a ni. He hmun thawh hi a manhla hle rualin, a lungchhiatthlak takzet a, Japanese hovin bacteria an khawina test tube hluite, mi tamtak an chiu hlumna syringe te, mi an zaihlumna chemte leh khum te han hmuh chuan mittui sum a har hle a ni.

Harbin hian Japan a hnaih hle si a,Japanese hi an va awm ve lo em em, Korean leh Russian an tam hle si a tiin, mak kan lo ti thin a, mahse he hmun tlawh hnu hi chuan a lo mak hlek lo mai a.He museum gate-ah hian saptawngin,"Friendship between the Chinese and Japanese people is everlasting" tih a inziak kuau a, museum chhung room tin maiah erawh chuan Chinese tawngin "Japanese hovin kan chunga thil an tih hi i theihnghilh ngai lovang u"tih a inziak ve thung. Chinese ho, a bikin Heilongjiang mipuite, Japanese kut tuar nasatute hian, an thinlungah hliam dam thei lo, huatna rehthei lo an pai a,Lalpa ah erawh chuan ngaihdamna famkim a awm a, chumi ngaihdamna an neih theihna tur chuan tunah hian thawktu tlemtein Chanchin Tha meichher kan chhi tan mek a ni. Mi chuti zozai chuan kha thil avang khan nunna an lo chan tawh a,thi tawhte chungah tih theih kan nei tawh lova, mahse a la damlaite hnenah erawh hi chuan Pathian hmangaihna chanchin hi kan hril thei a, tunah hian Harbin khawpui ah hian mi nuai 5 vel kan cheng a, tunah hian he hmunah hian hmangaihna leh ngaihdamna thu chu kan puangdarh dawn a ni tih hi he hmun ka tlawha min cho thartu lian em em anih phah a ni.