Harbin kan thleng fela, foreigner lo awmsa ten damloh huamin thlasik hmasakber chu hmachhawnturin min advice a(khawvawt vangin an damlo thin ani awm e)Inrinlawk ngaihna pawh kan hrelo. October kan kaia, vurzam atla tan seng senga, thlasik(dong tian)la intan lovin an sawi leh tanghala. Thinghnahte khawvawtin ahmetro zota veka, thinghring hmuhtur aawm talo...Thlasik tak tak chu alothlengta, temparature minus 20-30 ah atlathla ta vawn vawn maia. Avawhzual changin minus 30 apel zak zak bawka. Avawt lo, athip anizawk, pawnchhuahin hmai tihlan ngam ani talo, mitchauh tilangin kan in tuamphui thina, hnap tawlh leh tawlh loh pawh kan hretalo..Kan thawmhnaw hak apung telh telh a, kutkawr leh mawza tenen chuan avaiin 25 te kan inbel thin. Chhuak tura insiam ahautak hle. Rit tham zet kan inbel thin sia. Pawna an thilzawrh, thlai leh thei te pawhin blanket an sinta fir fer mai, kan tan chuan thil thar hmuhnawm atlinga. Chu mai nilo, bus te, car te hi engine zawn atihlumnan blanket an sintir zel. Thei te hi keinin achhiatlohnan fridge ah kan dah a, anni chu vawtin ahmehchhiat lohnan atilum turin abulah petromax an chhit loh leh meilum an ai tira. Kawng lah chu vurkhawn avangin anal tih piahlam ani, snow boot nen pawh kan eu zak zak fo mai. Luitui pawh a khang veka, kan khaw luipui, Song Hua river hi alian bawka, thlasik ah chuan kawngpui lianpui a ang ber, adum mam zur maithin. Min hrilh lawk nasaa, damlo tura kan inbuatsaih nasat nen, khawvawh vanga damlohna leh harsatna em em nei miahlovin thlasik vawithum kan hmangzota. Pathian hnenah lawmthu awm rawh se.
Ka tuiluimip: October atang in temparature below zero degree ani tana, thla engemaw zat vurin minkhuh thin, room heater a awma, anuam khawpmai, mahse(tar lama)thlasik uchuak han tuar chu ahautak vethin khawpmai, tuilumip hi ka tan thiantha atling. Ka pawmchawt ani ber, asa hian vun lah chu a titial duhphian. Atellovin zankhat pawh ka awm hleitheilo. Kan awmtirh atanga tuilumip ka leitawh zat kalo chhinchhiah chiah lova, 10 bawr aniin ka ring. Thlasik apiangin 2/3 ka leithar ziah, aleak duhreuh sia, lei angai zing vephianmai, atolemlo hlauhva. Hei tunah June thla laihawl kan thlengtoh dawna, keizawng tuilumip tello chuan nun harsa kala ti khawpmai. Reiloteah khawdanga pem turin kan inpuahchah meka, karkhat hnulekah kan kal tawh mai dawna, tuilumip ka thlahve lek lek tawh e, kalo ti rilrua, ni 2 liamta khan ka tuilumip in minpeihlohsan lehta....aw!karkhat min han dampui lehla, ka lawmdawn veinen, te ka tingawta, hauh asawt dersilo. Coke burruakah tuilum ka thuna, asawiduh phian lehnghal...karkhat lek atana han leithar leh chu tha ana vedeuh si.
Ice cream: Ice cream hi intihdaihnan kan ei thin kha ania, hetah erawh chuan thlasik laiin an ei nasa hle. Vurzuarte hian vurbawm an mamawh ve lo, kawngsirah an remtlar maia, an papawr zawrh vel mai mai ani. Miina kal apiangin min welcome nan atan Ice cream min pe vat vat zela, hmun hrang hrangah tihdan te te hi kanneia, heti khawpa thlasik vawhlaia vur ei chu achakawm lemlo, nuihzatthlak lamah te akal mah mah zawk.
Thingtlangah thlasik: Kan thiannuin an khuaa zin turin min sawma, thingtlang anih avangin a vawtzual ngeiang tih chu kan ring lawka, alovawt hle renga. Kan lo hriatloh erawh chu toilet lampang ani. Thingtlanglam na na na hi chu anla hniam ve khawpmai, an chenna hmun avawt bawka, an daily life ah inbual in hmun achanglo, apawimawhlo ani bermai. Kumkhatah vawi 2/1 nipui laia an inbual chuan an duhtawk, an inah Bathroom emaw, toilet emaw hmuhtur a awmlo. Zun leh ek pawh open air ah tihmai angaia, zun leh ek lah chu achhuak vesek mai sia, an inhnunglam chu an lo ani nghala, an lo sirkha ek-mual(!!!) ani lehnghalmaia, va kala, va ek mai tur ani. Ka kua athalo zui lehnghala, amanganthlak ngeimai. Pawnler khawvawta va inphelhsek chu anuam hauhlo mai, ka tlan zing si, buaithlak vefu ani. Harbin kan let leh chu- Pathian hnena khawvawh vanga ka chiau-hiarna zawng zawngte ka chhutleta, ka zak khawpmai...inchhung nuamtaka ekna kannei ringawt pawh hi Lalpa malsawmna, vanneihna ropui anih zia ka hrechhuaka, lawmna tur tamzia te nen....lawmthu sawi lothei ka nilo!
Snow and Ice Festival: Kan khaw larvena awmchhun he festival hi khawpui daiah kumtin neih thin ani. Khawvel hmun hrang hrang atangin chhim turin mite anlo kal khawmthin. Winter hmasa berah chuan kan cho nganglova, kan kal talova, akum lehah chuan kan univ foreign student zawng zawngte kalna tur univ in min ngaihtuahsaka, kan kal ve ta. Nidang zawng aia tam thawmhnaw kan inbel chhuakvea. Minus 40 zeta vawt alo ni nghe nghe a, analhin hmuntin ah ice lamp anchhi enga, azau bawk nen, entur hrang hrang alo tamhlea, ice/snow sculpture leh vura sak inlian pui puite kan enkuala, intih hlimnan, vur tawlhpahrit ah te kan han tawlh zak zak a, kan kalkual hrep hnuah pawh athem pawhin alum chuanghleilova, enkualnan darkar 1 hun minpea, a hmun azau si, hun minva pe reilove kanti nang nang hlawma, kan han kal tan dek dek a, chet ahar tanta hle, kutke a khawngin taksa in nikhua ahrelo tanta maia, darkar chanve lekah kan chuanna motor ah kan thiante nghakin kan lo thu vel ta mai mai a. Hmuhnawmin kal manhla hle mahse, taksain atlinta nganglo ani.
Nautelem hampuar: Winter thlalak thenkhatte ka chhungte ka thawnhawa, anlo en laih laiha, ka cousin 1 in, ehe...nautelem hampuar ava ang ve, alo ti!...inha puk thlalak thawn haw tawh nguar ang!
