Zai hi

Mizote hi zai hnam kan nia, kan culture ah pawh zai hian hmun pawimawhtak aluah ve reng reng ani. Mi 4/5 kan awmkhawm let let chuan kan zaithei deuhzel mai, zinkawngah pawh bus bang bengin hlim takin kan zai kawngtluan thak thei zela, kan local channel leh demand channel te pawh hmelhriatloh zaithiam tharlam pui pui an lo zai reng bawka, music video siam nazawng hi an zaithiamlo, zaithiam emaw an inti mai mai ani tih te, promoter nei tha tha hi an lar mai ani tihte, hriattur awm fothin mahse, an zaithiam emaw, zaithiamlo emaw, an zaithei fu vek bawk sia! Mizo te hi ahnam angin awtha hnam kan nia, hnamdang pawh hian mizo kan nih chuan zaithei turah min ngai ngawt zel mai ania. Pathianin zaitur renga aduan, hnam special tak kan lo ni ve hrim hrim.

Zai chungchang hi mimal tak pawhin sawitur ka neive nual. Zai ngaina mi ka nia, aw chhe chung chung Zaipawl leh group zai, eng enge maw ah te ka inhmangve nasa thin. Zoram ka ngaihna pawh zai ka chak vang ani fothin. Zaipuitur an awmchuan tlaivar thak thaka zai pawh ka peih thina, awchhang vek pawhin ka zai peih, hunreife voice box vung avangin aw chhang tham chhil chhel, duh hun huna ri chhuak theilo thin kha ka neia, Lalpa, heti khawpa zai ngaina si, tinge hetiang aw minpek mai chu le ka ti thin. Ka chakthin chu duhtawka Pathian faka zai ve theiha, mi aw key ang pawl phaa zai ve hi ania, aw thatak nei si, zai peih lo te hi ka fuih ka fuih thin. 2000 kum khan Lalpan min tidama, ka chak ang takin ka zai ve leh thei ta. Zai hi ning tur pawh ka ni lova, ka ning phal heklova, awchhan hrehawm zia ka man tawh a, Pathian faka zaitheihloh hrehawmzia pawh ka hretawha. Zaithiamlo mah ila, miin zai peih hriat tala min hriat chuan enge pawi? atha teh alawm ka ti!Lalpa faknan hian lua aawm lova, mintidamtu hi ka fak tawk thei dawn heklo. Ka aw ve hi a lai emaw, a beu emaw ka aw neihchhun chhun hmanga ka fak hi Lalpa tan rimawi ani sia.

Vanramah pawh banglovin Lalpa fakin kan la zai dawn ania, zai nuamtilo ho tan chuan aboring duh awm mange te ka ti rilru mai mai thin, zai nuamti deuh chuan vanram pawh kan enjoy zual hle dawn niawm tak ani. Vanramah tawng chi tinreng maia Lalpa kan han fak tur hi a ropui dawn hian ka ring mang e!

Home sick

Tleirawl pawr rual kan nih lai khan Lardiki'n lunglen awmzia a'n manlo ve thin mai mai khawpa, lunglen sawi dek dek chuan i ril atam anih kha...in eipuar la, areh mai ang a ti thin. anih ve mai duh hmel vephian.

In hlata awmin lung a lenga, Zoram pawnah lung alenga, Mizo rim hriatphak lohna ah a leng lehzual. Nawmsam loh changin lung alenga. Chhim ve phak loh chhiatni thatni ah pawh ...... sure loh pawn ngei ngei!

Lungleng chi ka niang...aleng thei emai!! Kei chu chhawrthlapui leh chhawrloh thlapui en lam aiin hunpui lo thlente hian ka lung a leng thin. Lunglen tak tak lai hi chuan hunthawltak nei ila, mahniin rilru kawm veng veng ila, ka duhthusam! Chhungte leh thiante ho lah chuan dawn pha ve heklo, sms in an awmdan an rawn sawi tumte hian, a lawmawm rualin lunglen a kaitho fo thin. kan khaw nawmve zia in ka chhanglet ve zela! Aruktak chuan ka lung aleng veng venga!

Kan thian ho kan awm darhsarha, internet bak chu inbiak pawhna kawng a awmlo. Nikhat chu Bsi ( Madagaskar) nen ka lunglen zet mai laiin kan inbia a, ka lunglen em em zia ka hrilh mawlh mawlh a, ani lah chuan keipawh a lengthin teh a sin, lunglen hi chu kan kumkhaw struggle tur ania ati mai a. Ahnuah Thanpuii (Samoa) nen kan inbiak tumin ka sawi leh a, awi ilungleng ve thin a law....i sawi khat sia , aleng ve lo anih dawn hi ka ti che a, kei chu ngaiah ka neih theilo, tiin a lunglen vethin zia min hrilh a. Kan hriselna panber LSi (Tuvalu) khawsik damkawr lungleng kawm alo nuam nasa mai bawk a, lungleng hi chu an ril a tam tlangpui , titu ber Lardiki lah chu Kathmandu atangin a lo lungleng alo tlangau pui ve bawk a. tunah internet a contact theihlohvin Moirang( Manipur) ah Zoram hnaih zawkah awm tawh mahse, aril atam fo ka ring!

Thil pakhat, lunglen chungchanga lawmawm ka tih ber mai chu Lalpa'n lunglen tuar tur leh tuar tlaka min ruat ve hi ani. Kan kumkhaw struggle tur pawh ani thei e, ala leng dawn chauh pawh ani thei e, lo leng ve mai mai se....chanvo ropui changah in ngai ila, a fuh ber awm e.

(Thian ho pual liau liau)

Nanyang lamah thung

Harbin mahni khua angmaiin kanlo ngaina hman tawha, pemsan alo hun meuh chuan ka lo ngainat hmanzia ka hrechhuak ani. A lunglen thlak ve vung vung khawpmai.Khawvela mihring tamna ber China rama mihring tamna ber province, Henan, naupan laia kan sawilar em em thin shaolin temple awmna province a Nanyang khua, khaw lianlo tak maiah kan insawna. Harbin nen chuan thil alo danglam nasa mai a. Nikum hmasa lama website pakhata ka chhiar, mipa khatin an naupan laia athiante nen shaolin temple hmuhchaka zawnchhuah antum chanchin a ziah, chhiar hlimawm takmaite kha ka hrechhuak rum rum mai.

Mandarin fir an hmanna hmun atangin local dialect an hman uarna lamah kan pema, an mandarin pawh alo khamphei dah mai a. A thluk a danglama, mahse kan inhrethiam ve mai zel bawk. Khawlianlo tak mai ania, International Phone card leitur pawh kan hmuzo lo! Foreigner an lo tlem em em maia, khawiah pawh maktih leh lawm kan hlawh thar leh ta.

Khawlian anilo bawka, mitinin veivahnan thirsakawr an hmanga, kan thlengthla a, veivah ve reng a ngaih avangin kan lei ve nghalvat a. Highway a khalh ve par par tur erawh chuan inzir deuh angai. Kawngsir sir kan chuha, a huailoh theih khawpmai. Naupan lai pawha harh ta ngang ka nia, BMX in vawi enge mawzat ka accident tawha, puitlin hnuah ka dawih thar leh hnuhnawh ani. (Vawikhat pawh Synod Bookroom bul chhukthla ah chaktawkin ka khalha, ka break theita silo, midum kawngsiam ka su ta bur mai a! zahthlak chem chem) Inzir deuh angaih avangin hunawl hlekah chuan ka inkhalhchhuak zela, hmanni pawh dawnfawh kawr kalo chil peka, kawngah ka tlu thal chiang hle. Chawn a duk thlek thluk a, pem neuh neuh a awm reng bawka. Ka sim chuang lem hlei lova.

School thar hawng turin hma kanla nghala, classroom leh thildang tihpahin, school thar advertise lam hna hmasa ah kan neiha, nitin public place leh school hrang hrang ah kal kualin advertisement kan sem thin. Tual hmunphiat in min hauh tawn tawn changte, school guard in min hauh changte a awma, kan tawn ngailoh experience thar ani! Chinese ringtuten min tawiawm tha hlea, KTP member(!!) leh Kohhran hmeichhia(!!) te kan advertisement min sempuiin anlo hnatlang vethin. Anuam khawpmai.

Khua alo lum uap churh maia, lifestyle pawh a danglam zak mai. Harbinah tukverh atanga pawn vawt alo luh lohnan tukverh thuahhnih nei kan hmang thina, Nanyangah tukverha thosi alo luh lohnan net a lo inzar phui hle thunga. Mutna ah pawh khum a daih nawmnan bedsheet chungah mau pher an phah diai a, a cool nuam khawpmai. Ka mang a chhe deuh aniang.... atir ni 3/4 kha chu ka taksaa mau hling khei in ka buai zak zak mai!